Calendar August 2011 – Ágúst 2011 dagatal

Júlí er liðinn og sumri tekið að halla. Loksins fór að rigna og allt er í blóma, kartöflugrösin vaxa og kálið stækkar eins og vera ber. Ágúst verður góður mánuður þó að rökkrið sé að færast yfir á kvöldin og dagarnir styttast. Ég fór í hringferð um landið um miðjan júlí í ljósmyndaferð og mynd ágústmánaðar er úr þeirri ferð. Myndin er tekin við útfall Jökulsárlóns þar sem ísjakar velta um í briminu og hverfa smátt og smátt. Þeir eru oft tærir og liturinn fer oft yfir í ljósblátt í stærri ísjökum.

Hér getur þú sótt þessa mynd með dagatali til að nota á skjáborðið þitt.

Lítil/Small, 1440 x 900 px –  Stór/Large, 1920 x 1200 px

Farið inn á þessa tengla, hægri-smellið á myndina og veljið „Use Image as desktop photo“

Njótið vel

Stolt

Gay-Pride_IMG_3884

Hinsegin dögum fylgir gleði og hamingja sem lýsir úr andlitum þátttakenda og þeirra sem fylgjast með hátíðarhöldum í Reykjavík. Hámarkinu er náð með skrúðgöngu niður Laugaveginn með þátttöku tugþúsunda gesta og skemmtun við Arnarhól í blíðviðri þennan laugardag. Litadýrð einkennir þennan dag, margir skreyta sig með litríku hálsskrauti og veifa fána samkynhneigðra og í lok skemmtunarinnar við Arnarhól var sleppt mörghundruð blöðrum í þessum sömu litum. Svifu þær upp og í norðvestur undan hægri golu og tóku stefnuna á Akranes og ég rölti heim á leið, stoltur yfir réttsýni og samkennd íslendinga með málstað samkynhneigðra.

Gleði

Sólhildur

Fátt er meira endurnærandi fyrir sálina en að vera úti í náttúrunni með ungum heimspekingi sem sér alltaf eitthvað nýtt og athyglisvert í hversdagslegum hlutum. Við spáðum mikið í fuglunum og hvar þeir ættu heima og lágum tímunum saman og horfðum á skýjin á „Töfrateppinu“ sem hún dröslaði með sér út um allt. Þegar maður er tæplega meter á hæð er maður miklu nær blómunum sem voru víða fyrir fótum okkar, hrafnaklukkur, geldingahnappar og sóleyjar. Hún kallar sóleyjarnar barnablóm og heldur sig algerlega við þau þegar henni langar til að tína sér blóm sem hún gefur svo afa eða ömmu með sér.

Auga stormsins

Auga stormsins

Það skiptast á skin og skúrir í veðrinu þessa dagana eins og í lífi þjóðarinnar. Eftir marga góða og hlýja sólardaga kemur rigning með kulda og roki og rekur mann inn í hús fyrr en ella hefði verið. Ég held að það sé búið að ofdekra okkur með allri þessari sól, og þetta sé bara til þess að rétta af viðmiðin svo að við njótum bara ennþá betur næsta sólardags.

Þetta er mynd af jörðinni okkar, allavega hluta af henni, tekin í um 2 metra hæð yfir Elliðaá í Reykjavík.

Frelsi

Regnbogi

„Frelsið er yndislegt, ég geri það sem ég vil…“ söng þessi mávur þar sem hann sveif í uppstreyminu yfir öskjuhlíðinni í fyrradag. Ómurinn heyrðist niður á svalirnar mínar þar sem ég kíkti útfyrir og fann um leið nokkra regndropa á andlitinu. Regnboginn sem myndaðist fyrir framan augun á mér náði með báða enda til jarðar og var mjög litfagur frá mér og myndavélinni minni séð. Mávurinn er örugglega frjálsari en ég og þú, hann þarf allavega ekki að hafa áhyggjur af ICESAVE og annari slíkri óáran eins og íslenska þjóðin, hans hugsun snýst ábyggilega bara um næstu magafylli.

Kurl

KurlKurl er ein af best þekktu afurðum íslenskra skóga, og má segja að í þessu tilfelli gildi það sem sagt er „Af jörðu ertu kominn, að jörðu skaltu aftur verða…“ en þessi kurlfarmur mun verða undir fótum mínum næstu árin og áratugina í Merkurlautinni. Nokkrar blöðrur í lófunum er ánægjulegur fylgifiskur þess að moka 300 kg. af kurli upp úr stórsekk og ofan í hjólbörur, í sólskini og 18 stiga hita. Er hægt að hugsa sér eitthvað skemmtilegra? Nei, ég hélt ekki 🙂